ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន នាឱកាសជួបពិភាក្សាការងារជាមួយ អគ្គនាយក នៃក្រសួងសេដ្ឋកិច្ច និងហិរញ្ញវត្ថុនៃសាធារណរដ្ឋកូរ៉េ លោកស្រី KIM Kyung Hee នៅថ្ងៃទី០៩ ខែមីនា ឆ្នាំ២០២៣ លោកបានស្នើឱ្យកូរ៉េសិក្សាគម្រោងគមនាគមន៍នានាដែលតភ្ជាប់ជាមួយគម្រោងសាងសង់ស្ពានមិត្តភាពកម្ពុជាកូរ៉េនៅប៉ែកខាងកើតភ្នំពេញ ដើម្បីសម្រាប់ទុកជាប្រវត្តិសាស្ត្រ (Landmark) នៃទំនាក់ទំនងមិត្តភាពរវាងប្រទេសទាំងពីរ។

នាជំនួបនោះ ភាគីទាំងពីរបានសន្យាថានឹងបន្តពង្រឹង និងពង្រីកកិច្ចសហប្រតិបត្តិការនានាតាមរយៈការផ្តល់ហិរញ្ញប្បទានអភិវឌ្ឍន៍ផ្លូវការ ក្នុងក្របខ័ណ្ឌឥណទានសម្បទាន ដើម្បីរួមចំណែកលើកស្ទួយសកម្មភាពអភិវឌ្ឍន៍ សង្គម-សេដ្ឋកិច្ចកម្ពុជា ឲ្យកាន់តែមានភាពរីកចម្រើន និងអភិវឌ្ឍន៍បន្ថែមទៀត។

ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន បានអរគុណដល់ប្រទេសកូរ៉េដែលសម្រេចផ្តល់នូវការសន្យាស្តីពីការផ្តល់ឥណទានសម្បទាន តាមរយៈកិច្ចព្រមព្រៀង ក្របខ័ណ្ឌឆ្នាំ ២០២២-២០២៦ ដែលមានទំហំទឹកប្រាក់ចំនួន ១៥០០លានដុល្លារអាមេរិកដែលបានចុះហត្ថលេខាកាលពីថ្ងៃទី០៩ ខែធ្នូ ឆ្នាំ២០២២។

ជាមួយនឹងការផ្តល់កិច្ចព្រមព្រៀងឥណទានសម្បទានសម្រាប់គម្រោងសាងសង់ស្ពានមិត្តភាព កម្ពុជា-សាធារណរដ្ឋកូរ៉េ ក្នុងទឹកប្រាក់ចំនួន ២៤៥ ៩០៩ ០០០លានដុល្លារអាមេរិក ដែលជាចំណងដៃដ៏ថ្លៃថ្លារបស់ភាគីមិត្ត និងជាការរឹតចំណងមិត្តភាពឲ្យកាន់តែរឹងមាំរវាងប្រទេសទាំងពីរ។

លោក អូន ព័ន្ធមុនីរ័ត្ន បានលើកឡើងថា ប្រទេសកម្ពុជា ជាប្រទេសឈរនៅលំដាប់ទី២ ក្នុងចំណោមប្រទេសទាំង១០ ដែលជាដៃគូកិច្ចសហ ប្រតិបត្តិការជាមួយ EDCF ដោយគិតចាប់ពីឆ្នាំ ២០០១ មកដល់ដំណាច់ឆ្នាំ២០២២ ភាគីកូរ៉េបានសន្យាផ្តល់ ឥណទានសម្បទាន មានទឹកប្រាក់សរុបប្រមាណជា ១ ៨០០លានដុល្លារអាមេរិក។

លោកថ្លែងថា៖ «ផ្តើមចេញពីការសន្យានេះ, កិច្ចព្រមព្រៀងឥណទានសម្បទាន រវាងក្រសួងសេដ្ឋកិច្ច និងហិរញ្ញវត្ថុកម្ពុជា និង EDCF ចំនួន៣២ ត្រូវបានចុះហត្ថលេខា ដែលមានទឹកប្រាក់សរុបប្រមាណ ១ ៦០០លានដុល្លារអាមេរិក សម្រាប់ហិរញ្ញប្បទានដល់ គម្រោងអភិវឌ្ឍន៍ចំនួន២៨ និង ១កម្មវិធី ទៅតាមយុទ្ធសាស្ត្រអភិវឌ្ឍន៍របស់ព្រះរាជាណាចក្រកម្ពុជា ផ្នែកតាមវិស័យអាទិភាពសំខាន់ៗ រួមមាន វិស័យគមនាគមន៍ (ផ្លូវថ្នល់ និងស្ពាន) អប់រំ សុខាភិបាល ថាមពល ធារាសាស្ត្រ ទឹកស្អាត និងប្រព័ន្ធចម្លោះទឹកកខ្វក់ ជាដើម»៕